වීල් එලයිමන්ට් කියන්නේ විශේෂයෙන්ම යුරෝපීය වාහන පදින ඔයාට ඉතාමත් වැදගත් දෙයක්. ඇත්තටම කියුවොත් ඔයාගෙ වාහනයේ වීල් එලයින්මන්ට් එක හරියට උනේ නැතිනම් ඔයාට ලොකු පාඩු විඳින්න සිදු වෙනවා. ඒවායින් ප්රධානම සහ බහුලව සිදුවන පාඩුව තමයි ටයර් අසමානව ගෙවී යාම. ඒ කියන්නේ ටයර් එකේ එක කොටසක් අනිත් කොටස් වලට වඩා ඉතා වේගයෙන් ගෙවීයනවා.
වීල් එලයින්මන්ට් එක හරියට නොවීම නිසා සිදුවන අනිත් පාඩුව තමයි අපේ වාහනයේ තියෙන සස්පෙන්ෂන් පද්ධතිය ඒ කියන්නේ ෂොක් ඇබ්සෝබර් තියෙන කොටස කැඩීයෑම. ඒකට හේතුව තමයි වීල් එලයින්මන්ට් එක හරියාකාරව නොවීම නිසා සස්පෙන්ෂන් පද්ධතියට අධික තෙරපුමක් ඇතිවීම.
ඉතින් මෙන්න මේ කරුණු නිසා ඔබ ඔබේ වාහනයේ වීල් එලයින්මන්ට් එක අනිවාර්යයෙන්ම කරගත යුතු වෙනවා. ඒ වගේම අපි වාහනය සර්විස් කරනවා වගේ වරින්වර එය සිදු කිරීමත් අනිවාර්ය වෙනවා. අද අපි මේ ලිපියෙන් කියන්නේ වීල් එලයින්මන්ට් කරන්නේ ඇයි? වීල් එලයින්මන්ට් කරනවා කියලා කියන්නේ මොකක්ද? ඒක කරන්න අවශ්ය වෙන්නේ මොනවගේ අවස්ථා වලදීද? කියන ඒවා ගැනයි. වීල් එලයින්මන්ට් ගැන කතා කරනකොට රෝද වල පිහිටීම මුලින්ම දැනගෙන ඉන්න ඕන,
අපිට හිතෙන්නේ වාහනයක රෝද කරකැවෙනකොට හරියටම ඔක්කොම එක සමාන්තරව පිහිටන විදියට කරකැවෙනවා කියලා නේද? එතකොට ඒ රෝදය ඇදකුද නැතිව කරකැවෙනවා කියලා නේද අපිට හිතෙන්නේ?
එත් එක්කම, අපි ස්ටියරින්ග් වීල් එක කරකවනකොට, රෝදය වාහනය ගමන් කරන දිශාවට අමතරව හරි මැද්දෙන් දෙපැත්තට කරකැවෙන්න ඕනනේ. ඒකත් ඇදයක් නැතිව කරකැවෙනවා කියලා නේද අපිට හිතෙන්නේ ?
අපිට එහෙම හිතුනට එහෙම වෙන්නේ නැහැ. රෝද කරකැවෙනකොට හරියටම එක සමාන්තරව රෝද පිහිටන්නේ නැහැ. ඉතින් ඒ නිසා එක සමාන්තරව රෝද කරකැවෙන්නෙත් නැහැ. එතකොට එක රෝදයක් ගත්තම ඒ එක රෝදය හරි කෙලින් පොලවට ලම්භකව පිහිටන්නේ නැහැ. ඒ නිසා රෝදය වාහනය ගමන් කරන දිශාවට කරකැවෙනකොට හරි කෙලින් පිහිටලා කැරකෙන්නේ නැහැ. ඒ නිසා අපි ස්ටියරින්ග් වීල් එක කරකවනකොට රෝදය එක තැන කරකැවෙන්නේ ඇද සහිතවයි.
වීල් එලයිමන්ට් කරනවා කියන්නේ මොකක්ද?
ඉතින් වීල් එලයින්මන්ට් කරනවා කියන්නේ ඔය කියන ඇද ටික ඇරලා අර අපි මුලින් හිතුවා වගේ රෝද ඔක්කොම එක සමාන්තරව පිහිටන විදියට, එක රෝදයක් වාහනය ගමන් කරන දිශාවට පොලවට හරි ලම්භකව කරකැවෙන විදියට, ඒ වගේම රෝදය ස්ටියරින්ග් වීල් එකෙන් එක තැන කරකවෙද්දී හරි කෙලින් පිහිටලා කරකැවෙන විදියට හදාගන්න එක. වීල් එලයින්මන්ට් එකේ කරන්නේ ඔන්න ඔය ඇද ටික හදනවා කිව්වට මොනාද ඔය ඇදකුද කියලා හරියටම ඉගෙනගෙන ඉන්න ඕන.
TOE එහෙමත් නැතිනම් ටෝ එක
TOE එහෙමත් නැතිනම් ටෝ කියල කියන්නේ අපි වාහනේ ස්ටියරින්ග් වීල් එක හරි කෙලින් තියලා, ඉදිරිපස හෝ පිටුපස තියෙන රෝද යුගලය දෙස උඩ ඉඳලා බලනකොට වාහනයේ ඇතුල් පැත්තට හෝ පිට පැත්තට ඒ ඒ රෝදය හැරවිලා තියෙන ප්රමාණයටයි. රෝදය වාහනයේ ඇතුලට හැරවිලා තියෙනවා නම් අපි කියනවා TOE–IN කියලා. රෝදය වාහනයෙන් පිටතට හැරවිලා නම් අපි කියනවා TOE–OUT කියල. සෑම වාහනයකම ඔන්න ඔය කිව්ව ටෝ එක තිබිය යුතු ප්රමාණය එක්තරා පරාසයකින් දක්වලා තියෙනවා. එහෙම නැතිනම් ටෝ එක අංශක -0006’ ට වඩා අඩු නම් අපි කියනවා TOE–IN කියලා ඒ වගේම අංශක 0006” වඩා වැඩිනම් අපි කියනවා TOE–OUT කියලා
CAMBER එහෙමත් නැතිනම් කැම්බර් එක
CAMBER එහෙමත් නැතිනම් කැම්බර් එක කියලා කියන්නේ අපි වාහනයේ ඉස්සරහ ඉඳන් රෝදය දෙස බලනකොට පොලවට ලම්බකව තියෙන අක්ෂයේ සිට රෝදය ඇල වී තියෙන කෝණයටයි. මේ කෝණය සෑමවිටම මනින්නේ අර කිව්ව පොලවට ලම්බක අක්ෂයේ සිටයි. ඒ නිසා ඒ කෝණය සෑම විටම සුළු කෝණයක් වෙනවා.
එතකොට ඔබට තේරෙන්න ඕන රෝදය පොළවට ලම්බක අක්ෂයේ සිට වාහනයේ ඇතුල් පැත්තට ඇලවෙන්නත් පුළුවන් වගේම වාහනයෙන් පිට පැත්තටත් ඇලවෙන්න පුළුවන් බව. ඔන්න ඔය ඇතුල් පැත්තට රෝදය නැවිලා තියෙනවා නම් අපි කියනවා ඒකට නෙගටිව් කැම්බර් කියලා. ඒ වගේම රෝදය වාහනයෙන් පිට පැත්තට ඇලවෙලා තියෙනවා නම් අපි කියනවා පොසිටිව් කැම්බර් කියලා. කලින් TOE එකේදී අපි කිව්වා වගේම CAMBER එකේදිත් සෑම වාහන මාදිලියකම එහි තිබිය යුතු CAMBER එකේ පරාසයක් තියෙනවා. එලයින්මන්ට් එකකදී කරන්නේ ඔන්න ඔය පරාසයෙන් පිටත අගයක CAMBER එක තිබුනොත් එය එම පරාසය තුල ඇති අගයකට ගන්න එක.
CASTER එහෙමත් නැතිනම් කැස්ටර් එක
කැස්ටර් එකට කලින් අපි දැනගන්න ඕන ස්ටියරින්ග් ඇක්සිස් කියන්නේ මොකක්ද කියලා. අපි දන්නවා වාහනයේ ස්ටියරින්ග් වීල් එක කරකවනකොට වාහනයේ ඉදිරිපස රෝද දෙක කරකැවෙන බව. අන්න ඒ කරකැවෙන අක්ෂයට තමයි අපි කියන්නේ ස්ටියරින්ග් ඇක්සිස් එක කියලා. ඔන්න ඔය ස්ටියරින්ග් ඇක්සිස් එක දිහා අපි වාහනයේ පැත්තෙන් බලනකොට ඒ ඇක්සිස් එකට පොලවට ලම්භක අක්ෂයේ ඉඳලා තියෙන කෝණයට තමයි අපි කියන්නේ කැස්ටර් එක කියලා.
එතකොට TOE සහ CAMBER වගේම CASTER එකේදිත් පොසිටිව් සහ නෙගටිව් කියලා දෙකක් තියෙනවා. එතකොට පොසිටිව් කැස්ටර් එක කියන්නේ ඔන්න ඔය ස්ටියරින්ග් ඇක්සිස් එක වාහනයේ රියදුරා දෙසට ඇලවී තියෙනවනම් අන්න ඒ අවස්ථාවට. නෙගටිව් කැස්ටර් කියලා කියන්නේ ස්ටියරින්ග් ඇක්සිස් එක වාහනයෙන් ඉදිරිපසට ඇලවී තියේනම් අන්න ඒ අවස්ථාවට. ඒ වගේම වාහන මාදිලියෙන් මාදිලියට ඔන්න ඔය කිව්ව කැස්ටර් එකේ තිබිය යුතු පරාසයක් තියෙනවා.
ඇත්තටම මෙහෙම වීල් එලයින්මන්ට් නැති වෙන්නේ ඇයි කියල දන්නවද?
දැන් ඔයාලා වීල් එලයින්මන්ට් ගැන ගොඩක් දේවල් දන්නව. හැබැයි ඉතින් හොඳට තිබ්බ වාහනයක නිකම්ම වීල් එලයින්මන්ට් නැති වෙන්නෙත් නැහැ. එහෙම වෙන්නත් හේතු තියෙනවා. ගොඩක් වෙලාවට වීල් එලයින්මන්ට් නැති වෙන්නේ රෝදය ආශ්රිතව රෙපෙයාර් එකක් කරන්න සිද්ද උනොත් තමයි. උදාහරණ හැටියට කොයිල් ස්ප්රින්ග්, CV ජොයින්ට් හෝ ෂොක් වගේ දේවල් අලුතින් දැම්මොත් වීල් අලයින්මන්ට් නැති වෙලා යන්න පුළුවන්. ඒ වගේම ඔබේ වාහනේ ලෝවර් ආර්ම් එක කැඩුනොත්, එත් වීල් මිස් එලයින්මන්ට් වෙනවා. මීට අමතරව ඔබේ වාහනේ බෝල් ජොයින්ට් එක ගලවන්න සිද්ද උනොත් එහෙම ඒ වෙලාවටත් රෝද මිස් එලයින්මන්ට් වෙන්න පුළුවන්. කොහොමහරි රෝදේ ඔය සංවේදී කොටස් අතපත ගෑවෙන විදියේ වැඩක් සිද්ද උනොත් වීල් එලයින්මන්ට් නැති වෙන්න ගොඩක් ඉඩ තියෙනවා.
ඉතින් ඔය කිව්ව දේවල් එක්ක වීල් එලයින්මන්ට් චෙක් කරන්න ඕන අවස්ථා ටිකක් අපිට පෙන්නලා දෙන්න පුළුවන්. දැන් බලමු ඒ මොනවද කියලා.
වීල් එලයින්මන්ට් කරන්න අවශ්ය වෙන්නේ මොන අවස්ථාවලද?
වීල් එලයින්මන්ට් කරන්න ඕන අවස්ථා නොදන්නාකම නිසා ඉතා විශාල පාඩු සිදුවෙනව. ඒ නිසා පහත අවස්ථා වලදී ඔබ ඔබේ වාහනයේ වීල් එලයින්මන්ට් එක කරගැනීම අත්යාවශ්ය කරුණක් වෙනවා.
- වාහනයේ ටයර් වල අසමාකර ගෙවියාමක් දකින්නට තිබේනම්,
- සැලකියයුතු අනතුරක් සිදු උනාට පසුව
- CV ජොයින්ට් අලුතින් දැමූ පසුව
- බෝල් ජොයින්ට් අලුතින් දැමූ පසුව
- ලෝවර් ආර්ම් එක හෝ එහි බුෂ් අලුතෙන් දැමූ පසුව
- සෑම කිලෝමීටර් 50000 කට වරක්ම
- ස්ටියරින් හා සස්පෙන්ෂන් පද්ධති වල අලුත්වැඩියාවක් සිදුකළ පසු, උදාහරණයක් විදිහට ෂෝක්ඇබ්සෝබර් කොයිල් ස්ප්රින් වැනි කොටස්
